श्रीप्रियाजू की नामावली – Shri Priya Ju Ki Namavali

श्री राधे । नित्य किशोरी । वृन्दावन बिहारिनी । वनराज रानी।
निकुंजेश्वरी । रूप रँगीली। छबीली। रसीली। रस नागरी ।
लाड़िली । प्यारी । सुकुँवारी । रसिकनी। मोहिनी । लाल-
मुखजोहिनी । मोहन-मन-मोहिनी । रति-विलास विनोदिनी।
लाल-लाड़-लड़ावनी। रंग केलि बढ़ावनी। सुरत-चंदन-
चर्चिनी । कोटि दामिनी दमकनी। लाल पर लटकनी। नवल
नासा – चटकनी। रस पुंजे वृंदावन प्रकाशिनी। रंग-विहार-
विलासिनी। सखी-सुख निवासिनी। सौन्दर्य रासिनी ।
दुलहिनी। मृदु हासिनी। प्रीतम नैन-निवासिनी । नित्यानन्द-
बरसिनी। उरजनि पिय-परसिनी । अधर-सुधारस बरसिनी ।
प्राणनि रस – सरसनी। रंग-बिहारिनी। नेह-निहारिनी।
पिय-हित-सिंगार-सिंगारिनी। प्यार सौं प्यारे को लै उर
धारिनी। मोहन- मैंन-विथा निरवारिनी। जान प्रवीन। उदार
सँभारनी। अनुराग सिंधे। स्यामा। बामा । भामा । भाँवती ।
जुवतिन-जूथ-तिलका । वृंदावन -चंद्र-चंद्रिका । हास-
परिहास-रसिका । नवरंगिनी । अलकावलि-छवि-फंदिनी।
मोहन मुसिकन मंदिनी। सहज आनन्द कंदिनी। नेह- कुरंगिनी ।
नैंन विशाला। महामधुर रस-कंदिनी। चंचल चित्त आकर्षिनी ।
मदन-मान- खंडिनी। प्रेम-रंग-रंगिनी । बंक कटाक्षिनी । सकल
विद्या-विचक्षिनी। कुँवर अंक विराजनी। प्यार-पट
निवाजिनी। सुरत- समर-दल-साजिनी। मृगनैंनी । पिकबैंनी
सलज्ज अंचला । सहज चंचला । कोक कलानि- कुशला ।
हाव-भाव चपला । चातुर्य चतुरा। माधुर्य मधुरा । बिनु भूषन
भूषिता । अवधि सौन्दर्यता । प्राण-वल्लभा । रसिक-रमनी।
कामिनी । भामिनी। हंस कल-गामिनी। घनश्याम अभिरामिनी ।
चंद-विपिनी। मदन दवनी । रसिक-रवनी। केली कमनी।
चित्तहरनी। ललन- उर पर चरन धरनी । छवि कंज-बदनी।
रसिक आनंदिनी। रूप-मंजरी । सौभाग्य- रसभरी। सर्वांग
सुन्दरी । गौरांगी। रतिरस रंगी। विचित्र कोक कला अंगी ।
छवि-चंद-वदनी । रसिक लाल बंदिनी। रसिक रस-रंगिनी ।
सखिनु सभा मंडिनी। आनंद-कंदिनी । चतुर अरु भोरी ।
सकल सुख – रासि सदने।

प्रेम सिंधु के रतन ये, अद्भुत कुंवरि के नाम ।
जाकी रसना रटै ‘ध्रुव’ सो पावै विश्राम ॥
ललित नाम नामावली, जाके उर झलकंत।
ताके हिय में बसत रहैं, स्यामा स्यामल कंत ॥

ललित रंगीली गाइये। तातें प्रेम रंग रस पाइये ॥
राधा गोरी मोहिनी, नवल किशोरी भाँम ।
नित्य विहारिनी लाड़िली, अलबेली वर वाम ॥
स्यामा प्यारी भांवती, नागरि परम उदार ।
वृंदाविपिन विनोदिनी कुंजनि-मनि सुकुंवारि ॥
मृगनैंनी गजगामिनी, पिकबैंनी नव बाल ।
अति सुंदर मृदु हासिनी, चंचल नैंन विसाल ॥
कुंज – कामिनी भामिनी, छबि- दामिनी अनूप ।
पिय-हिय-मोद – प्रकासनी, चंद वदनि रस रूप ॥
रसिक रंगीली रंगभरी रही लाल उर-पूरि ।
पियहि लड़ावनि सुख लड़ी, प्रीतम जीवन मूरि ॥
मनहरनी सुठि सोहनी नवल छबीली भाँति ।
वृंदावन जगमगि रह्यौ अंगनि की छवि काँति ॥
कुंज बिलासिनि दुलहिनी, आनंद रूप निधान ।
सखियनि-मोद बढ़ावनी, पिय प्राननि के प्रान ॥
‘हित ध्रुव’ यह नामावली, जो करि है उर-माल ।
ताके हियै दिनहिं बसैं, नेही मोहन लाल ॥


← पिछला: श्रीराधा के 28 नाम  |  अगला: श्रीलालजू की नामावली →  |  📖 सभी भाग देखें

Bring the sacred air of Vrindavan home

Handmade malas, pure dhoop, attar, jaap counters and revered books, packed in Vrindavan and shipped worldwide.

Free shipping above ₹999Dispatch in 24 hoursCash on Delivery
Bestsellers from Vrindavan
Shopping Cart
Scroll to Top